Ѕид

Решивме да градиме ѕид, јас и ти.

Трпеливо, камен по камен

да ја предизвикаме утробата

да ги расплетеме прстите

Решивме да градиме ѕид.

Ден по ден, редам јас, редиш ти,

Се камења симнати од градите,

Песок што ни го фрлале во очите,

Велиш, ајде до над глава, за да не се гледаме.

Решивме да градиме ѕид, јас и ти,

да не речат другите оти сме други,

да не мисли светот дека сме грешни,

Тогаш нека прости светот

што градиме дури водиме љубов

Градиме ред бакнежи, ред вода

Градиме гради на гради

Оти решивме да градиме ѕид јас и ти

Да не рече некој не сме биле добри.