Причина

Мојата присутност никогаш не била мерлива
Барем не онака како што ти пробуваш да ја мериш
Бадијала си се обидувал
Наклонетоста на една девојка
да ја спакуваш во некаков си временски размер
мислејќи дека баш ти чучиш
во папокот на градот
(Центрипеталноста чувај си ја
за некоја што полесно се влече)
Јас и руса и инаква
Разбирам потполно се што ќе ми кажеш
оставајќи ти простор да бидеш попаметниот
(така не учеа нашите баби
така отприлика и се врти светот)
А знам што би сакал
Би ме сакал мене
ама аморфна
Би ме сакал мене
Неоформена
Би ме сакал мене
каква што ти ќе ме направиш
Кутриот ти
Никогаш не научи
Дека има причина
што дури и ваква
Не знаев да ти кажам
Не.