Теории

Наводно
Немало ништо еротско
во начинот на кој некој јаде омлет
и ништо фројдовско
во свиркањето на иста мелодија во исто време
Нормалните луѓе наводно
не губеле нерви со објаснување
на огномети и чудни временски појави
А поклопувањето на мислите
иако недоволно истражено
Најверојатно било резултат
на чиста коинциденција
Ако е така
тогаш зошто ми се чинат толку тажни
сите тие нормални луѓе
Кои ме уверуваат дека тоа што
во последно време зрачам
речиси сигурно се должи
на промени во исхраната